Улсын бүртгэлийн байгууллага 2025 онд улсын хэмжээнд 1,206,015 улсын бүртгэл хийсэн бөгөөд иргэн хамгийн багадаа 3 удаа биечлэн ирж очсон гэж үзвэл давхардсан тоогоор 5 сая орчим зорчих хөдөлгөөн хийсэн гэсэн үг.
Зөвхөн иргэн, хуулийн этгээдээс улсын бүртгэлийн нэгжид барьцаалбарыг бүртгүүлэх, чөлөөлөх зорилгоор жилдээ 265,033 удаа ирсэн байх бөгөөд хамгийн багадаа 3 удаа очсон гэж үзвэл 795,099 удаа биечлэн ирсэн байна.
Тухайлбал, зөвхөн үл хөдлөх эд хөрөнгийн барьцаалбар бүртгүүлэх гэж тухайн иргэн банканд 3 удаа, нотариатад 1 удаа, бүртгэлийн байгууллагад 2 удаа нийтдээ 6 удаагийн үйлдэл хийдэг. Харин үл хөдлөх эд хөрөнгийн барьцаалбараа чөлөөлүүлэхийн тулд банк болон бүртгэлийн байгууллагын дунд 2 удаа явж байна.
Бүртгэлийн барьцаалбарын үйлчилгээг цахим болгосноор иргэн, хуулийн этгээд олон удаагийн үйлдэл хийхгүй, цахимаар хүсэлт гарган цаг хугацаа хэмнэхээс гадна замын түгжрэлийг бууруулах ач холбогдолтой юм.
