Украины Ерөнхийлөгч Владимир Зеленский Беларусьт байршуулсан Оросын дроны дохио дамжуулах дөрвөн станцыг зогсоохыг шаардсаны дараа тэдгээр төхөөрөмж одоогоор ажиллахгүй болсон гэж Al Jazeera мэдээллээ. Эдгээр станц нь Оросын дронуудын дохиог хүчтэй болгож, Украины баруун бүс рүү илүү гүн нэвтрэх боломж олгодог байсан гэж эх сурвалжууд тайлбарлажээ.
Зеленский зургаадугаар сарын 19-нд Беларусийн Ерөнхийлөгч Александр Лукашенкод хандан уг төхөөрөмжүүдийг зогсоох нэг долоо хоногийн хугацаа өгч, эс бөгөөс Украин өөрөө арга хэмжээ авна гэж мэдэгдсэн байна. Үүний дараа Лукашенко уг төхөөрөмжүүдийг чимээгүйхэн ажиллуулахгүй болгосон гэж Украины тал мэдэгджээ.
Беларусийн тал үүнийг энх тайвны төлөөх алхам хэмээн тайлбарласан ч Оростой хамт хэвээр гэдгээ мөн илэрхийлсэн байна. Харин Киевт төвтэй шинжээчид үүнийг Зеленскийн шаардлагад хийсэн албан бус буулт, Украины дипломат амжилт гэж үзэж байна.
Шинжээчдийн тайлбарласнаар энэ үйл явдал нь Беларусь Украины эсрэг дайнд шууд оролцохоос зайлсхийх, мөн Оросын нөлөөг тэнцвэржүүлэх гэсэн оролдлогын нэг хэсэг байж болзошгүй юм. Москва энэ талаар албан ёсоор тайлбар хийгээгүй ч Кремлийн хэвлэлийн төлөөлөгч Дмитрий Песков Зеленскийн шаардлагыг “түрэмгий” гэж мэдэгдсэн байна
