Пакистаны Засгийн газар эмэгтэйчүүдийн ариун цэврийн хэрэглэл болон жирэмслэлтээс хамгаалах бүтээгдэхүүнд ногдуулдаг борлуулалтын татварыг цуцлахаар болсноо мэдэгдлээ. Энэхүү шийдвэрийг эмэгтэйчүүдийн нөхөн үржихүйн эрхийн төлөө ажилладаг хуульчид, иргэний нийгмийн байгууллагууд сайшаан хүлээн авч байна.

Тус улсад сарын тэмдгийн хэрэглэлд 18 хувийн борлуулалтын татвар, импортын бүтээгдэхүүнд нэмэлт 25 хүртэлх хувийн гаалийн татвар ногдуулдаг байсан бөгөөд үүнийг олон нийт “сарын тэмдгийн татвар” хэмээн нэрлэдэг байв. Үүний улмаас зарим бүтээгдэхүүний үнэ 40 хүртэлх хувиар өсдөг гэж судлаачид үздэг.

Сангийн сайд Мухаммад Аурангзеб ариун цэврийн хэрэглэл нь эмэгтэйчүүдийн эрүүл мэнд, нэр төр, нийгмийн амьдралд оролцох боломжтой шууд холбоотой зайлшгүй хэрэгцээний бүтээгдэхүүн учраас татвараас чөлөөлөх шаардлагатай гэж мэдэгджээ. Мөн жирэмслэлтээс хамгаалах хэрэгслийн 18 хувийн татварыг мөн хүчингүй болгохоор болсон байна.

Энэхүү өөрчлөлтийг хэрэгжүүлэхэд залуу хуульч Махнур Омер болон Ахсан Жехангир Хан нарын өрнүүлсэн олон нийтийн кампанит ажил чухал нөлөө үзүүлжээ. Тэд сарын тэмдгийн хэрэглэлд ногдуулж буй татвар нь эмэгтэйчүүдэд чиглэсэн ялгавартай бодлого гэж үзэн шүүхэд хандсан бөгөөд тэдний санаачилга олон нийтийн өргөн дэмжлэгийг авч чадсан байна.

НҮБ-ын Эмэгтэйчүүдийн байгууллага энэхүү шийдвэрийг сайшааж, сарын тэмдгийн эрүүл мэнд нь тансаг хэрэглээ бус, харин эрүүл мэнд, нэр төр, тэгш эрхийн асуудал болохыг онцолжээ. Гэсэн хэдий ч идэвхтнүүд сарын тэмдгийн ядуурал, хүртээмжийн асуудлыг бүрэн шийдвэрлэхийн тулд цаашид илүү олон арга хэмжээ шаардлагатай гэж үзэж байна.