Израилын Ерөнхий сайд Биньямин Нетаньяху Ирантай хийсэн дайны үеэр Арабын Нэгдсэн Эмират улсад нууцаар айлчилсан талаар түүний ажлын алба мэдэгдлээ.
Энэ айлчлал нь 2020 онд харилцаагаа хэвийн болгосон хоёр улсын хамтын ажиллагаа улам гүнзгийрч байгааг харуулж байна гэж “Associated Press” агентлаг мэдээлэв.
Нетаньяху АНЭУ-ын Ерөнхийлөгч Шейх Мохаммед бин Заед Аль Нахаянтай уулзсан бөгөөд уг уулзалт “Израил, Арабын Нэгдсэн Эмират улсын харилцаанд түүхэн ахиц авчирсан” гэж Израилын талын мэдэгдэлд дурджээ. Харин АНЭУ Нетаньяхугийн айлчлалын талаар одоогоор тайлбар хийгээгүй байна.
Энэ мэдээлэл АНУ-аас Израилд суугаа Элчин сайд Майк Хакаби Израил улс “Төмөр бөмбөгөр” агаарын довтолгооноос хамгаалах систем болон түүнийг ажиллуулах бие бүрэлдэхүүнийг АНЭУ руу илгээсэн гэж мэдэгдсэний маргааш гарсан байна. AP-ийн мэдээлснээр, Израилын цэргийн хэрэгслийг АНЭУ-д байрлуулсныг нийтэд ил болгосон нь хоёр орны аюулгүй байдлын хамтын ажиллагаа өргөжиж буйг харуулж байна.
АНЭУ нь өнгөрсөн сард гал зогсоох тохиролцоонд хүрсний дараа ч Ираны пуужин, дроны халдлагад өртсөн гэж AP мэдээлжээ. Тус улс хөрөнгө оруулагчдад улс орон нь бизнесийн хувьд нээлттэй, аюулгүй хэвээр байгаа гэсэн дохио өгөхийг хичээж байна.
Израил, АНЭУ 2020 онд “Абрахамын гэрээ”-ний хүрээнд дипломат харилцаагаа хэвийн болгосон. Тухайн үед энэ тохиролцоог Иран шүүмжилж байсан бөгөөд Иран Израилыг АНЭУ-д цэрэг, тагнуулын оролцоотой гэж өмнө нь удаа дараа мэдэгдэж байжээ.
