Зуухнаас дөнгөж гаргасан шинэ талх хамгийн амттай байдаг. Гэвч савлахын өмнө сайтар хөргөхгүй бол савласны дараа талх чийгтэж, муудах талтай. Тиймээс дэлгүүрт зөвхөн хөрж, бас шинэлэг амт нь гээгдсэн талх зарагддаг.
Тэгвэл материалын мэргэжилтэн Окамура Такэхиша талхны чийгийг гадагшлуулж, харин амт үнэрийг нь хэвээр хадгалдаг уут бүтээжээ.
“Окамура-Касей” компанийн ерөнхийлөгч тэрбээр 3 жил "оролдсоны" эцэст санасандаа хүрч, энэхүү уутыг бүтээж чадсан байна.
Уутны гаднаас агаар ордоггүй учраас доторх хүнс нь исдэггүй, харин чийгийг гадагш нэвчүүлдэг тул мөөгөнцөр үүсгэдэггүй энэ бүтээгдэхүүн нь “Орон нутгийн шилдэг бүтээгдэхүүний шагнал” хүртжээ.
Японы Кочи мужийн аж үйлдвэрийн технологийн төвийн тогтоосноор энэ уутан дотор талх тасалгааны температурт 7 хоног хадгалсан ч амт, үнэр нь хувираагүй байжээ.
“Пан-Оисии-мама” буюу "Талхыг шинээр нь" гэж нэрлэсэн энэ уут 2023 онд нэг сая ширхэг борлуулагдсан нь жилийн дотор 2 дахин өссөн байна.
Хоёр талх элбэг багтах ийм уутны 3 ширхэг нь 495 иен буюу 13 мянга орчим төгрөгийн үнэтэй юм байна.
