Засгийн газрын ээлжит хуралдаан өнөөдөр 08:00 цагаас эхэлж, нийт 20 гаруй асуудлыг хэлэлцэж байна.

Хуралдаанаар эрүүл мэндийн салбарынхны цалингийн тогтолцоог цэгцлэх, бизнес эрхлэгчдэд тулгамдаж буй асуудлыг шийдвэрлэхэд чиглэсэн бодлогын баримт бичгүүдийг авч хэлэлцэж байгаа юм.

Тодруулбал, импортын зарим барааны гаалийн албан татварын хувь, хэмжээг тогтоох тухай, бизнесийн орчныг дэмжих зарим арга хэмжээний тухай, дотоодын үйлдвэрлэлийг дэмжих арга хэмжээний тухай зэрэг Засгийн газрын тогтоолын төслүүдийг хэлэлцэж байна.

Мөн Улсын Их Хурлын гишүүдийн санаачилсан Санхүүгийн хоршооны тухай хуулийн шинэчилсэн найруулга, Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах, Зөвшөөрлийн тухай хуульд өөрчлөлт оруулах тухай хуулийн төслүүдэд Засгийн газраас өгөх санал, дүгнэлтийг хэлэлцэж байна.

Үүнээс гадна “Улсын үзлэгийн мөрөөр авах зарим арга хэмжээний тухай”, “Эрүүл мэндийн салбарт авч хэрэгжүүлэх арга хэмжээний тухай” зэрэг асуудлыг тус хуралдаанаар авч хэлэлцэж байгаа юм.