Монголын Төмөр замын инженерүүдийн холбоо, Нэгдсэн төслийн удирдлагын газрын төлөөллүүд уулзаж, нийслэл Улаанбаатар хотод хэрэгжүүлж буй нийтийн тээврийн томоохон төслүүдийн норм, стандартыг боловсруулах талаар санал солилцов.
Метро, Трамвай нь манай улсын хувьд анхдагч, шинэ төрөл учир Төмөр замын тээврийн тухай хуульд хамаардаггүй. Тиймээс энэ салбарт шинэ хууль батлах, зарим хуульд нэмэлт өөрчлөлт оруулах хэрэгтэй бөгөөд бусад дүрэм, журам бүхий 100 орчим эрхзүйн акт боловсруулах шаардлагатайг Монголын Төмөр замын инженерүүдийн холбооны ТУЗ-ийн дарга, Зөвлөх инженер Б.Баярсайхан тодотгов. Нийслэлийн иргэдэд хүртээмжтэй, аюулгүй, олон улсын түвшний тээврийн дэд бүтцийг бүрдүүлэхийн тулд нийтийн тээврийн салбарт баримтлах норм, стандартыг шинэ шатанд гаргах, үндэсний стандарт болгох шаардлагатайг талууд онцоллоо.
