Хэрэглэгчдийг чанартай эрчим хүчээр найдвартай хангах,  түгээлтийн алдагдлыг бууруулах, хэмнэлт, үр ашгийг дээшлүүлэх зорилготой “Ухаалаг тоолуурын шинэчлэлт, зохицуулалт” сэдвээр хэлэлцүүлэг өнөөдөр боллоо.

Хэлэлцүүлэгт ЭХЯ, ДҮТ ТӨХХК, УБЦТС ТӨХК, Нийслэл түгээх сүлжээ ХХК, Узбекистан Улсын “Тошэлектроаппарат” ХХК, “Гэрэгэ системс” ХХК болон цахилгаан түгээх, цахилгаанаар зохицуулалттай хангах үйл ажиллагаа эрхэлж буй 26  компанийн 100 гаруй төлөөлөгч оролцож, эрчим хүчний салбар дахь ухаалаг тоолуурын хэрэглээ, үр ашиг, төслийн хэрэгжилтийн үр дүн, шинэ шийдлийн талаар харилцан санал солилцов. 

Манай улсын хувьд эрчим хүчний салбарын эрх зүйн орчны талаар хэлэлцэж, төлбөр тооцооны тогтолцоог боловсронгуй болгох, хэрэглэгчдэд эрчим хүчний хэрэглээгээ оновчтой зохицуулах, хянах боломжийг бүрдүүлэх талаар санал зөвлөмж гаргахаар боллоо.

Өнөөдрийн байдлаар Монгол Улсын хэмжээнд 974,311 цахилгаан эрчим хүч хэрэглэгчдэд 1,016,817 тоолуураар борлуулалт хийж байгаагаас 2025 оны хагас жилийн гүйцэтгэлээр 386,324 буюу нийт хэрэглэгчдийн 38 хувийг ухаалаг тоолуураар шинэчилжээ.

Харин 630.5 мянган ширхэг буюу 62 хувийг 2028 оны  түвшинд шинэчилж дуусгах зорилт тавин ажиллаж байна.

Ингэснээр хэрэглэгчдийн хувьд хүссэн үедээ үнэн зөв мэдээллээр хангагдан хэрэглээгээ хянаж хэмнэлт хийх, байршлаас үл хамааран төлбөрөө төлөх, нар салхи зэрэг сэргээгдэх эрчим хүчний үүсгүүрийг ашиглах, үйлчилгээг түргэн шуурхай чирэгдэлгүй авах, эрчим хүчний салбарын хувьд хэрэглэгчийн хэрэглээг оновчтой зөв төлөвлөх, бодит хэрэглээнд суурилсан тарифийн зохицуулалт хийх, түгээлт, хэрэглээг бодит цагт хянах, алдагдал, хууль бус хэрэглээг бууруулж эдийн засгийн чадавхийг сайжруулахад ахиц дэвшил гарч цаашид “Ухаалаг сүлжээ”-д шилжих суурь нөхцөлийг бүрдүүлэх юм.